ਤਪਦੀ ਰਾਹ ਤੇ ਕੱਲ੍ਹੇ ਚੱਲੇ , ਬੈਠ ਗਏ
ਯਾਦ ਤੇਰੀ ਦੇ ਰੁੱਖੜੇ ਥੱਲੇ , ਬੈਠ ਗਏ
ਕੀ -ਕੀ ਆਇਆ ਯਾਦ ਮੈਂ ਤੈਨੂੰ ਕੀ ਦੱਸਾਂ
ਤੇਰੇ ਸ਼ਹਿਰ ਚ ਜਾਕੇ ਕੱਲੇ ਬੈਠ ਗਏ
ਮੁੜਕੇ ਸਫ਼ਰ ਪਿਛਾਂਹ ਨੂੰ ਕੀਤਾ ਕੀ ਦੱਸੀਏ
ਆਕੇ ਉੱਥੇ , ਜਿੱਥੋਂ ਚੱਲੇ , ਬੈਠ ਗਏ
ਚੋਰ - ਉਚੱਕੇ ਪਹੁੰਚੇ ਉੱਚੀਆਂ ਥਾਂਵਾਂ ਤੇ
ਮੇਰੇ ਵਰਗੇ ਕਿੰਨੇ ਝੱਲੇ , ਬੈਠ ਗਏ
ਪਿਆਰ -ਮੁਹੱਬਤ ਰਾਸ ਆਂਦੀ ਹੈ ਕਿਸ ਨੂੰ ਦੱਸ
ਜਿਸ -ਜਿਸ ਲੱਗੇ ਰੋਗ ਅਵੱਲੇ, ਬੈਠ ਗਏ
ਕੀ ਕੀਤਾ ਈ ਯਾਦ ਤੁਸਾਂ , ਅੱਖ ਗਿੱਲੀ ਕਿਓਂ
ਚੱਲਦੇ -ਚੱਲਦੇ ਕਿਹੜੀ ਗੱਲੇ ਬੈਠ ਗਏ
ਇੱਕ ਦੇ ਹੋਕੇ ਸਾਰੀ ਉੱਮਰ ਗੁਜ਼ਾਰ ਲਈ
ਕੂਕਰ ਬਣਕੇ ਬਸ ਦਰ ਮੱਲੇ , ਬੈਠ ਗਏ
ਔਖੀ ਕਾਰ ਮੁਹੱਬਤ ਵਾਲੀ , ਲੰਮੀਂ ਰਾਹ
ਔਖੇ -ਸੌਖੇ ਹੋਕੇ ਚੱਲੇ , ਬੈਠ ਗਏ
No comments:
Post a Comment